Në historinë e jashtëzakonshme të forcës njerëzore, pak emra shkëlqejnë me aq kontrast dhe hijeshi sa ai i Katie Sandwina, një grua që nuk sfidoi vetëm pesha të pabesueshme fizike, por edhe pritshmëritë shoqërore, për rolin e gruas në fillim të shekullit XX. Në një epokë ku feminiteti lidhej më shumë me delikatesën sesa me fuqinë, ajo u bë mishërimi i asaj që sot do ta quanim “femër e pamposhtur”, një ikonë e kurajos, rezistencës dhe elegancës fizike. Jeta e saj është një fletë e paharrueshme në historinë e cirkut, sportit dhe emancipimit të gruas.
Katie Sandwina, e lindur si Katharina Brumbach më 6 maj 1884 në Vjenë, Austri, ishte një nga gratë më të fuqishme të të gjitha kohërave. Me një gjatësi prej 1.85 metrash dhe një peshë rreth 90 kilogramësh, ajo mahniti publikun në arenat e forcës dhe cirkut në fillim të shekullit XX, duke u shndërruar në një legjendë të gjallë.
E rritur në një familje artistësh cirku me 14 fëmijë, Katie u stërvit që në fëmijëri nga prindërit e saj, të dy me trupat të fuqishëm dhe të përkushtuar pas artit të performancës. Babai i saj, Philippe Brumbach, organizonte sfida publike, duke ofruar shpërblime për çdo burrë që mund ta mundte të bijën në një ndeshje mundjeje, por Katie doli gjithmonë fitimtare. Në njërën prej këtyre sfidave ajo mundi një akrobat të ri, Max Heymann, i cili më pas u bë bashkëshorti i saj dhe partneri i përhershëm në jetën skenike dhe personale për 52 vjet.
Fama ndërkombëtare i erdhi në 1902, kur në një garë ngritjeje peshe në New York, ajo sfidoi vetë Eugen Sandow, i konsideruar si “njeriu më i fortë në botë”. Ndërsa Sandow arriti të ngrejë një peshë prej 136 kg vetëm deri në gjoks, Katie e ngriti atë me lehtësi mbi kokë, një akt që jo vetëm i siguroi asaj fitoren, por edhe pseudonimin “Sandwina”, si versioni femëror i emrit të kundërshtarit të mundur.
Në vijim, ajo performoi me sukses për cirkun Ringling Bros. dhe Barnum & Bailey, ku shfaqjet e saj përfshinin ngritjen me një dorë të bashkëshortit të saj që peshonte 75 kg, përkuljen e shufrave hekuri, thyerjen e zinxhirëve me duar dhe madje rezistimin ndaj tërheqjes nga katër kuaj njëkohësisht. Ajo gjithashtu mbante mbi supe një top të rëndë prej 272 kg, ndërsa qëndronte stoike përballë duartrokitjeve të publikut të mahnitur.
Katie dhe Max sollën në jetë dy djem. Njëri prej tyre, Theodore Roosevelt Sandwina, u bë një boksier i njohur gjatë viteve 1920, ndërsa Alfred Sandwina ndoqi një rrugë në aktrim. Në vitet e mëvonshme të jetës, familja hapi një bar-restorant në Ridgewood, Queens (New York), ku edhe pasi kishte dalë nga arena e spektaklit, Katie vazhdonte të shfaqte forcën e saj legjendare, duke përkulur pirunë, ngritur klientët e habitur dhe ndarë histori nga e kaluara e saj mahnitëse.
Katie Sandwina u shua më 21 janar 1952, por la pas një trashëgimi që tejkalon çdo akt cirku apo rekord force. Ajo mbetet një figurë frymëzuese që ndërthur forcën fizike me guximin e karakterit, një dëshmi e gjallë se feminiteti nuk ka kufij kur shoqërohet me vullnet dhe vendosmëri.
Përgatitit: Albert Vataj
