Nga Albert Vataj
Më 4 shkurt të vitit 2014, është ndarë nga jeta në moshën 69-vjeçare, violinisti, Ibrahim Madhi. Vitet ikin kaq shpejt kur mungesa i thërret jehonave me zë përjetësie. Ata rendin në zbraztësi duke lënë pas kujtesën që rivjen për ndërmendje. Dhe sot, ne që njohëm, ata që vlerësuan dhe duartrokitën, vijmë kokëulur dhe përjetues ndër çaste dhe grishje kujtimesh që na sjellin atë, duke mos lejuar që harresa të mbush vendin që la ikja e tij.
Prej vitit 2014, Ibrahim Madhi, nuk është më. Ai mungon mes artistëve, mes violinistëve, studentëve, mes miqve. Ai do të mungojë më së shumti familjes, të afërmve. Ai iku për të lënë nga pas një boshllëk, që mundet me e mbush vetëm kujtimet për të. Ata kujtime që reken me e rikthy hera-herësh tansinë e tij shembullmirë.
Ibrahim Madhi, gjatë rrugëtimit të tij artistik u bë pjesë e institucioneve më të rëndësishme të vendit, si Orkestra e Radio Televizionit Shqiptar, Teatrit të Operës dhe Baletit, Ansamblit Shtetëror të Këngëve dhe Valleve, si dhe të Institutit të Lartë të Arteve duke qenë mbamëndje e pashlyeshme e memories së tyne, si një virtuoz që ka rrëmbyer ovacionet dhe afrinë e publikut, shqiptar dhe atij të huaj, duke qenë njëheras dhe ambasadori i vlerave shpirtërore shqiptare në skenat konceptore n vende të ndryshme të votës.
Violinisti i tingullit të bukur, elegant dhe shprehës, ka treguar individualitetin e tij të spikatur artistik në skenat e Shqipërise, Kosovës, Turqisë, Rumanisë, Kinës, Greqisë, Italisë, Austisë, Francës, Gjermanisë, Zvicrës etj. duke marrë vlerësime dhe duartokitje frenetike. Me përgjegjësi dhe kualitet të lartë artistik ka interpretuar pothuajse të gjithë repertorin violinistik shqiptar, duke i bërë premierën shumicës së tyre. Ai ka shumë or inçizime e regjistrime në studio apo direkt nga sallat e koncerteve me Radio Tiranën, Televizionin Shqiptar, Radio Prishtinën, Radion e Pekinit (Kinë), Radion e Gracit (Austri) etj., të cilat vazhdojnë të jenë në transmetim.a
Ai shkëlqeu me veprat e kompozitorëve shqiptarë si Zadeja, Harapi, Simoni, Peçi, Jakova dhe nga literatura botërore si Bah, Vivaldi, Paganini, Bethoven, Çajkovski, Brahms, Moxart, etj. U shqua si një violinist me temperament, teknikë të përsosur, vibrato të shkëlqyer, tingull të ëmbël dhe perfeksion në teknikën dhe plastikën e tij të interpretimit. Në vitin 1967 është fitues i Çmimit të Madh të Dekadës së Majit. U nderua si violinisti më i mirë i vitit me çmimin “Tefta Tashko” në vitin 1986. Për meritat, vlerat dhe kontributet tij është vlerësuar me çmimin e lartë “Artist i Popullit”.
Mungesa e tij ka pesë vite në mes. Por kurrsesi nuk ka të fundit kurrçka tjetër që e lidh me atë; violinist virtuoz, njeri të mirë, bashkëshort të dashur, prind të përkushtuar, profesor korrekt dhe mik të pashoq.
