Albert Vataj
Shumë përfytyrime kanë endur atë çfarë përfaqëson prekjen qiellore, shkasin e një përshkimi drithërimash drite që vibron në havanin e dimensioneve të ndermjetme, ku ne gjendim të vendosur jetët tona dhe krijuesit. Këtë zbraztësi që shugullon, këtë frymë që mbush kraharoret e shpirtrave që i mbrun eteri, gjithnjë jemi rrekur ta ravijëzojme me figura, imazhe jetësore, pëshpërima pulsimesh që kërkojnë ritmin e vet brenda nesh. Dhe ja ku janë, ata të hyjshmit, kerubinët e Rafaelit, fëmijët e ngjizur në shkrepëtima galaksishë. Dhe ne, ne ajo ndjenja delikate, sa e thyeshme aq dhe qëndruese, e cila rreket të gjej në këtë pjesëmarrje, në këtë zallamahi vezullimesh, fijet më të holla të dritimit, ata që na lidhin për të na dërguar lart, te gjendjet e hyjshme. Engjujt janë ata që na presun e na përcjellin në rrugën tonë të dëshirimit të të hyjshmes. Falë talentit të mjeshtrave si Rafaeli, ne kemi arritur të kemi një kontakt me atë botë, të cilën edhe pse nuk e jetojmë, ne kemi mësuar gjithçka për të, sepse është pjesë e dëshirave tona. Dhe janë këto kerubinë, kjo magjepsje që na i jep.
Edhe pas kaq vitesh, ngulmëtia e kerubinëve të Rafaelit, vazhdon të jetë po kaq i depërtues, brishtësia e këtyre engjëjve vështrimtar është po kaq e dlirë dhe ngasëse në kungim estetik e kërshëritës. Janë ëngjëjt më të hyjshem që kanë cytur anden e njeriut në 500 vite jetë. Është fragmenti i shkëputuri i një prej pikturave nga më të pakrahasueshmet, e kumtuar si pjesëz e së gjithës. Engjëjt e mjeshtrit të Rilindjes Italiane, Raphael Urbinos (6 prill ose 28 mars 1483 – 6 prill 1520) , janë pjesë e pikturës “Sistine Madonna”(1513–1514), punë të cilën e ka porositur Papa Julius II më 1512 dhe është finalizuar në dedikim. E ku nuk e ka gjetur mishërimin e vet në bashkëjetimin 500-vjeçarë me njeriun, kjo copëz e mrekullisë së pikturës së Rilindjes. Ç’nuk janë endur e sejdisur me këtë vështrim depërtues të këtyre engjëjve. Krejtkjo si dëshmi e njeriut për ta pranuar Zotin, brishtësinë e dlirësisë, së cilës i druhet pambarimisht njeriu, kjo krijesë po kaq delikate në shpirt sa edhe këto ëngjëj.
