Nga Albert Vataj
Nuk do të kishte një mënyrë më origjinale se kjo për të kremtuar ditëlindjen e At Gjergj Fishtës, për të risjellë në shpirtin e përtëritjes, jo vetëm poetin, por edhe figurën qendrore të veprimtarisë politike dhe artistike, klerike dhe diplomatike të asaj kohe të stuhishme të kapërcyellit historik. Për të rikthyer në kujtesë dhe mirënjohje, një prej figurave monumentale të përkatësisë sonë identitare.
“Mrizi i Zanave”, përmes një postimi të bërë në mediat sociale, ka laçuar zhvillimin e një eventi, sa të veçantë aq dhe domethënës, “Shtegu i Poezisë Fishtjane”, i cili në vetvete është një udhëtim në pafundësinë e magjisë së vargjeve të Poetit Kombëtar, por edhe zbritjen nga qielli në tokë të këtij vullneti përjetësie dhe krenarie, për ta çuar këtë shpirt të poezisë në çdo shtëpi fishtjane dhe në çdo përkatësim të hyjshëm të begatimit dhe bujarisë së amanetit të brezave, që “Shtëpia asht e Zotit e mikut.”
“Shtegu i Poezisë Fishtjane”, do të zgjatojë si një pelegrinazh i shenjtë në datat 23,24,25, dhe do të finalizojë më 26 tetor. Ky udhëtim simbolik është me rastin e 23 tetor 1871, 154-vjetorin të ardhjes në jetë, në këtë truall, të Homerit Shqiptra, me emrin e pagëzimit Zef, i biri Ndokë Simon Ndocit dhe Prendes së Lazër Kaçit nga Kotrri, më i vogli i tre vëllezërve dhe një motre, që u bë ndër më të mëdhenjtë shqiptarë të historisë.
E veçanta e këtij eventi nuk është vetëm shtegtimi poetik i Fishtës, vargjet që do të shoqërojnë në vendlindjen e poetit, por edhe mikpritja që do të shtrohet në çdo sofër të vendlindjes së poetit dhe kritikut. Në Fishtë të Zadrimës, aty ku hodhi hapat e parë Zefi i vogël, banorët në nder të këtij privilegji do të hapin dyert e shtrojnë sofrat. Do të presin me një nga urimet më të jashtëzakonshme, që u del nga zemra dhe shpirti, “Mirë se ju ka prû Zoti!”, dhe do të dëshmojnë se janë të denjë, për ta ofruar përulësinë dhe mirësinë, si një shprehje e mirënjohjes së asaj që ata përfaqësojnë, jo vetëm si fishtjanë por edhe si shqiptarë.
Bashkia Lezhë së bashku me gjithë banorët dhe bujtinat e fshatit Fishtë, hapin dyert në këto data në kremte të Tetorit Fishtjan. Ata ftojnë dashamirësit e Fishtës, shkollat, familjet të jenë vizitorë të kësaj bujarie fishtiane, të këtij begatimi zemrash dhe sajdisje duarsh dhe përkujdesi, që me punë dhe përkushtim kanë shndërruar vendlindjen e poetit të madh, në një nga atraksionet lider të turizmit dhe disa nga piketat më unike të sipërmarrjes së agroturizmit.
Duhet konsideruar sakaq falënderimi që “Mrizi i Zanave” i bën Drejtoreshës së Kulturës së qytetit Lezhë për përkujdesjen, që kjo sipërmarrje të kapi pritshmëritë për të qenë një kremtim dinjitoz për Fishtën e madh në Fishtën e duarve të palodhura dhe sofrave të mikpritjes.
Sot që idetë vlejnë po kaq sa edhe realizmi i këtij nderimi për birin e tyre, ky event me shumë gjasë do të hyjë në manifestimet kulturore dhe kulinarike si një traditë, si një pasurim i vlerave dhe mirënjohje e përkatësisë, si një zgjim përmes ndërmendjes.
