Albert Vataj
Në një botë ku emrat bëjnë jehonë përmes rrjeteve sociale dhe yjet ndriçojnë shpesh nga distanca, historia e Ergys Pepajt nuk është vetëm një sukses personal, është një dëshmi e gjallë se ëndrrat nuk kanë kufij. Nga rrugët e Koplikut në Malësinë e Madhe, te skena madhështore e O₂ Arena-s në Londër, ai sfidoi të pamundurën, u nis pa dokumente, por me një besim të palëkundur në vetvete, dhe sot bën foto me Ëill Smith, shënon gola ndaj Jens Lehmann dhe ngre flamurin shqiptar mes legjendave të futbollit botëror.
Ky nuk është vetëm një rrugëtim. Është një thirrje për ata që guxojnë të ëndërrojnë, një histori suksesi që flet shqip, një shpirt i etur për dritën e përmbushjes.
Një natë yjesh në O₂ Arena, një emër që shkëlqeu më shumë se të tjerët: Ergys Pepaj. Në një atmosferë të elektrizuar, ku përziheshin emrat më të mëdhenj të futbollit botëror me ikonat e skenës së madhe, u ngjit në skenë një djalosh nga Kopliku, dikur një emigrant pa dokumente, sot një yll në ngjitje në Britaninë e Madhe.
Fotoja që ai ndau me ndjekësit e tij në Instagram, ku shfaqet duke bërë shqiponjën përkrah aktorit legjendar Ëill Smith, nuk është vetëm një moment krenarie. Është simbol i asaj që përfaqëson rruga e tij: një histori sfide, guximi dhe ringritjeje.
Në eventin gala të organizuar si pjesë e finales së Baller League UK, ku u përplasën ikonat e së kaluarës me krijuesit më të ndjekur të përmbajtjes së sotme, Pepaj jo vetëm që u përfshi, ai bëri diferencën. Tre gola ndaj Jens Lehmann, legjendës gjermane të portës, ishin më shumë se arritje personale: ishin tronditje për skenën. Reagimet ishin të menjëhershme, nga Will Smith e deri te Mario Balotelli, që nuk fshehu befasinë. Publiku, i zjarrtë dhe kërkues, shpërtheu në ovacione.
Pavarësisht humbjes 7-6 të skuadrës së tij, ishte performanca e Pepajt ajo që doli në faqet kryesore të rrjeteve sociale, dhe në kujtesën e të gjithëve që ishin të pranishëm atë natë.
Historia e Ergys Pepajt është një rrëfim që do të duhej të ishte skenar filmi. Një i ri që mbërriti ilegalisht në Britani me kamion, duke punuar në çdo punë të mundshme për të mbijetuar, por me një ëndërr që nuk e la asnjëherë pas: futbolli. Dhe telefoni. Ato që dikur ishin mjetet e përditshmërisë së thjeshtë, u kthyen në armët më të forta të rrugës së tij drejt njohjes.
Sot, ai është një influencues i afirmuar, me miliona ndjekës dhe bashkëpunime që përfshijnë yje të kalibrit si:
Erling Haaland, Jack Grealish, Phil Foden, Bruno Fernandes, Aymeric Laporte, Granit Xhaka, Roberto Carlos dhe Ronaldo “Fenomeni”.
Videot e tij virale shpalosin një identitet të veçantë, ku humori, loja me topin dhe përfaqësimi krenar i Shqipërisë janë të pandashme.
Në edicionin e parë të Baller League UK, që mblodhi 12 ekipe të përbëra nga yje të rrjeteve sociale dhe përmbajtës të njohur, finalja u zhvillua në Copper Box Arena. Titulli i shkoi ekipit SDS FC, por ndeshja që fitoi zemrat ishte padyshim ajo “Legjendat kundër Krijuesve”, aty ku Pepaj shkroi faqen e tij më të ndritur.
Ergys Pepaj është më shumë se një emër në rrjet. Ai është dëshmi e gjallë se asgjë nuk të ndalon nëse ke pasionin dhe guximin për të mos ndaluar së ecuri. Është një thirrje për të gjithë të rinjtë shqiptarë, kudo që janë, që ëndrrat janë reale, për sa kohë jeni gati të paguani çmimin për to.
Në një natë kur yjet e botës ishin të ftuar nderi, ishte një djalë nga veriu i Shqipërisë që i la pa fjalë.
Dhe tashmë, ai nuk është thjesht një figurë që shfaqet në ekranin e telefonit. Ai është një frymëzim, një simbol se diku, dikush me emrin tënd, me sfidat e tua, po arrin të ngjitet lart, dhe në këtë udhëtim, Shqipëria është gjithmonë me të.
