Albert Vataj
“Përshkrimi i vërtetë i së ardhmes sime”, kështu quhet kjo karikaturë e një argjentinasi të njohur. Cinizëm dhe ironi, sarkazëm, tragjzëm gjithashtu. Megjithatë, realitet!
Ky është ai syresh ëndërrtar që zgjohet nga amnezia dhe e tashmja i ofron si alternativë një zgjidhje, vetëm një, të shesë diplomën në tregun poshtërues të lypësit.
Sot ti mund të shesësh gjithçka në këtë tezgë, madje edhe mundin dhe përpjekjet që bëre, duke besuar te ëndrrat e mëdha të dijes dhe shkollimit.
Askush nuk ofron një çmim për vlerën e vërtetë të asaj që shet ky ardhmëtar. Shumë e gjatë pritja, më e gjatë se padurimi, më e padurueshme se fyerja. Nuk di të shesësh as shpirtin e as mendjen, je i mbaruar. Do të ketë prej atyre që do të qeshin me ty, edhe nga ata që të mëshirojnë.
Ç’të mbetet të bësh kur pritja nuk mund të presë më?!
Ndoshta e pranojnë ta japësh falas, atë që kishe për të shitur. Mund të jetë një çmim që nuk ia vlen, por që të lë ende të besosh te vlerat, te dinjiteti. E nesërmja ka gjithnjë një arsye të shpresosh. Ndoshta vjen dikush dhe, në një përpjekje për të shpëtuar shpirtin e arratisur vanitetit dhe zbrazëtisë, ka një vleftë për diplomën tënde. Gjithsesi, të shitesh kundrejt çfarëdo vlere, apo të jepesh falas përkundër ndonjë iluziono apo morali, nuk ka kurrfarë rëndësie. Ti nuk mund të jesh më vetja. Ëndrra jote e madhe ka vdekur. Ti gjithashtu pret që të zgjasë agonia. Merr frymë dhe jeton si dikush tjetër. Mban të njëjtin emër, por ke tjetër surrat që shihesh me të e të përbuzin.
Nuk të ka mbetur asgjë veç e sotmja. Nesër është nesër edhe për ty që ke mbetur te e djeshmja.
Foto: Karikaturë e argjentinasit, Jó Rivadulla, grafik dizajner, publicist, redaktor krijues, ilustrues dhe shkrimtar.
