Albert Vataj: Impresion për foton e Ruzhdi Ibrahimi “Shqiponja peshkngrënëse në fluturim”!

Ja se çfarë arrin të bëjë pasioni, të ndalojë kohën një fraksion të sekondës, sa një shkrepje, për të shpërfaqur në një ceremonialitet gjestesh solemnitetin e natyrës. Kjo nuk është thjeshtë një foto, është ngadhënjimi i një çasti.Jeta na ka bekuar me fjalët më të lartësuara në hyjnim, na shpërblen çdo ditë me veprën e përkushtimit dhe ëndrrave tona, sikurse përmes një përkorjeje të kulluar gjestesh bujarie, i zgjat duart e mbushura me dritë, duke na dhuruar frytin më të ëmbël të qiellit, fluturimin. Krijuesi, jo domosdoshmërish duhet të zbresë nga misteri i më të blatuarit besim, ku ne flijojmë motivimin e lartë, Ai dërgon shëmbëllimin e vet në duart dhe pasionet e një shpirti të kulluar në mirësi, për të na rrëfyer përmes veprës së tyre, se më çfarë Ai zgjedh të na shpërblejë. Një foto, sa njëmijë e një arsye për të besuar se edhe unë mund të fluturoj…